Respublika Qarabağ Əlillərinə Qayğı İctimai Birliyinin Tovuz rayon filialı fevralın 24-ü 2020-ci ildə təsis olunub. Sədr, ehtiyatda olan mayor, müharibə veteranı Vəliyev Etibar Əli oğlu, müavinləri, ehtiyatda olan mayorlar, müharibə veteranları Sadıqov Mustafa, Məmmədov Rəhim, II qrup Qarabağ əlilləri Babayev Çingiz, Ələkbərov Nadir, Məhərrəmov Vidadi, Hüseynov Emin olmaqla, cəmiyyətin 3500 üzvü var. Bunlardan 300 nəfər Vətən müharibəsi iştirakçısı olmuş gənc qazilərdir.
Cəmiyyətin yaranmasında, formalaşmasında, inkişaf etməsində və bu günki nailiyyətlərində Etibar müəllimin rəhbərliyi ilə sadaladığım bu şəxslərin böyük əməyi vardır.
Yarandığı gündən bu günə qədər aktivliyini itirməyən, hər işdə öndə olan cəmiyyət, indi də QƏQİB-in respublika üzrə nümunəvi filialları sırasındadır. Gördükləri işlər barədə təvazökarlıqla danışan Etibar Vəliyev Tovuzun bütün kəndlərində filialın özəklərini, nümayəndəliklərini yaratdıqlarını, fəaliyyətlərini genişləndirdiklərini qeyd etdi Həm Qarabağ, həm Vətən müharibəsi iştirakçıları olan döyüşçülərdən ibarət birlik aktiv fəaliyyətləri ilə Tovuz rayon şəhid ailələrinin, qazilərinin, veteranlarının çox böyük rəğbətini qazanıb.
Filialın nəzdində yaradılan “Gənclər təşkilatı” gənc qazilərin müayinəsi, müalicəsi, onların xəstəxanalara yerləşdirilməsi və digər sosial problemlərinin həlli ilə məşğuldur. Gənc qazilərin qarşılaşdığı hüquqi məsələlərlə də bağlı hər cür yardım göstərilir. Bu günə qədər yüzdən çox döyüşçünün müayinə, müalicə olunmasına, səfərbərlikdən tərxis olunmuş gənclərin problemlərinin həllinə yardımçı olmuşlar.
Cəmiyyət fəaliyyətini inkişaf etdirib genişləndirməklə yanaşı, yerli qurumlarla da sıx əməkdaşlıq edir. Tovuz rayon İcra hakimiyyəti, polis orqanları, ictimai təşkilatlar filialın müraciətlərinə biganə qalmır, şəhid ailələrinin, qazilərin, veteranların qayğı və problemlərini birlikdə həll edirlər.
Tovuz rayonunun millət vəkilləri də birliklə işbirliyi yaradıb, onlara dəstək olur, müraciətlərinin müsbət həll olunmasında əllərindən gələni edirlər. Deputatlar Qənirə Paşayeva, Ülviyyə Ağayeva və Arzu Nağıyev cəmiyyətlə əməkdaşlıq edərək, daima köməklik göstərirlər. Onların bu cür dəstəklərinə görə hər iki xanım millət vəkili filialın fəxri üzvü seçilmişlər. Ehtiyatda olan polkovnik Arzu Nağıyev isə müharibə veteranı olduğu üçün daimi üzvlüyə qəbul edilmişdir.
Bir neçə gün öncə Tovuz rayon Yanıqlı kəndindən olan şəhid, müddətdən artıq xidmətdə olan çavuş Huseynov Eminin 2-ci övladı dünyaya göz açmışdır. Tovuz rayon İcra Başçısı Məmməd Məmmədovun təşkilatçılığı ilə Etibar Vəliyev və onun komandası şəhid övladının yüksək səviyyədə, təmtəraqlı xəstəxanadan çıxarılıb, evə yola salınmasında iştirak etmişlər.
44 günlük Vətən müharibəsi dövründə və müharibədən sonra bütün şəhid dəfnlərində İcra hakimiyyəti ilə çiyin-çiyinə çalışan cəmiyyət sədri və üzvləri indi də şəhidləri unutmur, məzarlarını ziyarət edir, ailələrinə dəstək olurlar.
Fevralın 23-də doğum günü olan Tovuz rayon Əsrik-Cırdaxan kəndindən olan “Azərbaycan Bayrağı” ordenli şəhidimiz, Baş leytenant Hüseynov Əfşan Əbülfəz oğlunun məzarını ziyarət etməyi, gül-çiçək və əklillərlə bəzəməyi də unutmadı vətənpərvər döyüşçülər. Demək olar ki, Tovuzun şəhidlərinin məzarlarını ziyarət etmək, ailələrinə baş çəkmək, problemlərilə maraqlanmaq filialın gündəlik planlarına daxil edilmişdir.
Deyirlər, ən yaxşı yaxşılıq unudulan yaxşılıqdır. Bu bir il ərzində Qarabağ əlillərinə, veteranlarına, şəhid ailələrinə göstərdikləri qayğı, etdikləri ərzaq və digər yardımlar, köməkliklər, onların müayinə və müalicə məsələləri, xüsusi və bayram günlərində imkansız ailələri unutmamaq, hər zaman onların yanında olmaq və sair və ilaxır, bütün bunlar Etibar müəllimin rəhbərliyi ilə idarə olunan bu cəmiyyətin yorulmadan, usanmadan etdiyi təmənnasız yaxşılıqlardır.
Gördükləri işlərin 1 illik hesabatını verən Etibar müəllimi təbrik və təltif etmək üçün Respublika Qarabağ Əlillərinə Qayğı İB-nin sədri Firidun Məmmədov Tovuza gəlmiş və burada, pandemiya şərtlərini nəzərə alaraq, keçirilən tədbirdə iştirak etmişdir. Zəhmətlərini dəyərləndirərək Vəliyev Etibar QƏQİB-in “Fəxri diplom”una, Çingiz Babayev, Sadıqov Mustafa, Əmrahov Mehman, Ələkbərov Nadir, Hümbətov Yunis, QƏQİB-in “Fəxri fərman”na layiq görülmüşlər.
Filialın əməkdaşı Süleymanova Əntiqə və İdeoloji işlər üzrə müavin, ehtiyatda olan mayor, veteran Abbasov Daşdəmir də “Fəxri fərman”na layiq görülmüşlər.
İş varsa, inkişaf da var, inkişaf varsa, yüksəliş də var, yüksəliş varsa, qiymət də var. Bu qədər zəhməti, əziyyəti, təmənnasız xidməti görüb dəyərləndirməmək, heç olmasa, xoş sözlər söyləməmək haqsızlıq olar. Etibar müəllimin yaratdığı, hərbçi nizam-intizamı ilə fəaliyyət göstərən Tovuz filialı daha böyük təriflərə, təltiflərə layiqdir.
1 yaşını tamamlayan Tovuz rayon filialının döyüşkən və vətənpərvər üzvlərinə daha böyük uğurlar əldə etməyi, qarşılarına qoyduqları məqsədlərə çatmağı, ancaq xoş xəbərlərini eşitməyi arzulayaraq, müvəffəqiyyətlər, uzun ömür, sağlam həyat diləyirik. 1yaşınızı təbrik edirik! Həmişə eyni ruhda, Tovuz qartalları!
XURAMAN ETİBARLI
Comments