Qarabağ Əlillərinə Qayğı İctimai Birliyinin Göygöl rayon filialı bu gün 1 yaşını qeyd edir. Filial 22 fevral 2020-ci il tarixdə təsis olunmuşdur. Sədri Qarabağ veteranı Araz Abbasov, müavinləri 2-ci qrup Qarabağ qazisi Teymur Bayramov, Qarabağ veteranları inqilab Quliyev və İntiqam Həşimov olmaqla, 200 nəfər 1-ci Qarabağ müharibəsi, 250 nəfər Vətən müharibəsi iştirakçılarından ibarət 450 nəfər üzvü var. Bu 1 ildə cəmiyyət inkişaf etmiş, üzvlərinin sayı da günü-gündən artmaqdadır.
Adından bəllidir ki, üzvləri əlillər və veteranlar olan bu cəmiyyət Qarabağ əlillərinə, veteranlarına, o cümlədən şəhid ailələrinə qayğı göstərmək, sosial problemlərini həll etmək, yardımlar göstərmək missiyasını daşıyır. Araz Abbasov və onun komandası bu işin öhdəsindən layiqincə gəlir, hər zaman hər bir işdə öndə olur, heç bir prosesdən geri qalmır. Onların gördükləri xeyirhax işlər o qədərdir ki, sadalamaqla bitmir.
Yarandığı ilk günlərdən bu günə kimi qazilərin, veteranların, şəhid ailələrinin yaxın dostuna çevrilən Göygöl rayon şöbəsi Qarabağ Əlillərinə Qayğı İB-nin ən aktiv, ən öndə gedən filiallarından biridir. Bir il ərzində pandemiya və karantin nəticəsində işsizliklə qarşılaşan imkansız əlillərə, veteranlara, şəhid ailələrinə müxtəlif ərzaq yardımları göstərməklə yanaşı, onların digər sosial problem və qayğılarının həllində yaxından köməklik etmişlər.
44 günlük Vətən müharibəsi dövründə də Göygöl filialı şanlı ordumuza həm ön cəbhədə, həm arxa cəbhədə dəstəyini əsirgəməmiş, yaralılara baş çəkməklə yanaşı, onların gündəlik qayğılarını (üz təraşı, sac qırxımı, çatışmayan dərman və tibb ləvazimatlarını alınması və s.) qarşılamağı da öz öhdələrinə götürmüşlər.
Şəhid dəfnlərinin təşkil olunmasını öz üzərinə götürən cəmiyyət, həm də onların ailələrinə mənəvi dəstək olub. Bu günə qədər də qazilərə, şəhid ailələrinə baş çəkmək, onlara maddi və mənəvi yardım etmək onların əsas məqsədlərindən biridir. Qazilərin yüksək səviyyədə qarşılanmasında, onların problemlərinin həllində də yaxından dəstəyini göstərən Göygöl filialı 100-dən artıq qazinin və şəhid ailəsi üzvlərinin müalicə olunması üçün xəstəxanalara yerləşdirilməsinə köməklik göstərmiş, imkansız ailələrə ərzaq yardımı etmişlər.
Göygöl filialının uğurlarından biri də odur ki, Göygöl rayon İcra hakimiyyəti, Prokurorluq və Polis orqanları, Həmkarlar İttifaqı və bütün rayon ictimaiyyəti cəmiyyətlə işbirliyi yaradıb və onların fəaliyyətində yaxından dəstək göstərirlər. Buna görə də İcra aparatından da, polis orqanından da, həmkarlar ittifaqından da cəmiyyətin sədri və üzvləri razılıq edir, onların dəstəyi və işbirliyi sayəsində yeni uğurlara imza atırlar. Azərbaycan Respublikası Dövlət İdarələri və İctimai xidmət işçilərinin Göygöl rayon Həmkarlar İttifaqının sədri Möhdəsim Səmədov, Araz müəllimin dili ilə desək, cəmiyyətin arxa- dayağıdır, köməyini, yardımını əsirgəməyən məmurlardandır.
Fəaliyyətinin 1 ilinin tamam olması münasibətilə, pandemiya şərtlərinə uyğun olaraq, Göygöl rayon Heydər Əliyev Mərkəzində tədbir təşkil edilib. Tədbirdə Respublika Qarabağ Əlillərinə Qayğı İctimai Birliyinin sədri, 1-ci qrup Qarabağ qazisi Firidun Məmmədov da iştirak edirdi. Öncə Göygöl Şəhidlər xiyabanı ziyarət olundu, daha sonra ulu öndər Heydər Əliyevin abidəsinin önünə güllər qoyuldu, şəhidlərin və ulu öndərin ruhuna dualar oxundu. sonra tədbir davam etdi. Cəmiyyətin yüksək səviyyəli fəaliyyətində rolları olmuş yerli qurumların nümayəndələri “Fəxri üzv”lüyə götürülməklə yanaşı, həm də QƏQİB-in “Fəxri diplom”una və “Fəxri fərman”ına layiq görülmüşlər. Filialın işində fəal iştirak edən üzvlər də “Fəxri fərman” və “Fəxri diplom”la təltif olunublar.
Qazilərin, şəhid ailələrinin, veteranların yanında olan, onlara kömək edən, yardım göstərən, qayğısına qalan hər bir kəs, hər hansı bir qurum, təşkilat, qısası, kim olursa-olsun hörmətə, haqqında danışılmağa, öyünməyə və örnək olmağa layiqdir. Biz sizinlə fəxr edirik, Vətənin vətənpərvər oğulları! Özünün köməyə ehtiyacı olduğu halda, başqalarına dəstək olan yardımsevər, xeyirhax insanlara eşq olsun! Bir iliniz min olsun! Yeni uğurlar və xoş xəbərlər adınızla bir addımlasın, qardaşlar!
XURAMAN ETİBARLI
Comments