Respublika Qarabağ Əlillərinə Qayğı İctimai Birliyinin Göygöl rayon filialı barədə bir neçə dəfə materiallar paylaşmışıq. Filial yarandığı gündən bu günə kimi ancaq yaxşı və nümunəvi işləri, əməlləri ilə gündəmdə qalmağı bacarır. Onlar haqqında yazmaq da çox asan olur, çünki gördükləri işlərin elə azacıq bir hissəni işıqlandırsaq kifayət edir. Deməli, fəaliyyət olanda, irəliləyiş hiss olunanda yazmağa da söz tapılır.
QƏQİB-in Göygöl filialının sədri Araz Abbasov gördükləri işlərdən o qədər də danışmağı sevməsə də, bəzi məqamları deməmək haqsızlıq olardı. Araz müəllim, onun müavinləri, aktiv üzvlər birlikdə cəmiyyətin işini görməklə yanaşı, davamlı olaraq I Qarabağ və Vətən müharibəsi iştirakçılarının qayğıları ilə də məşğul olur.
DİQQƏT.info olaraq 44 günlük müharibədə Göygöl filialının nümunəvi fəaliyyətindən danışmışdıq. Zəfər qələmizdən sonra da Araz müəllim və onun komandası Şəhid ailələrini, qaziləri unutmur, mütəmadi onlara baş çəkir, problemləri ilə maraqlanır və lazımi köməkliklərini göstərirlər.
Şəhid ailələrinə xüsusi diqqət göstərən keçmiş döyüşçülər, şəhidlərin məzarlarını tez-tez ziyarət edirlər. Qazilərin müayinə və müalicə məsələlərində yaxından kömək etməklə bərabər, onların gündəlik qayğıları ilə də maraqlanırlar. Onlara bu xeyirxah işlərində rayon rəhbərliyi, ictimai təşkilatlar və xeyriyyəçi insanlar dəstək verir, yardımlarını əsirgəmirlər.
Göygöl rayonun adlı-sanlı adamları, xeyriyyəçi insanlar hər zaman Araz müəllimin müraciətinə müsbət cavab verir, yardım aksiyalarında fəallıq göstərirlər. Şəhid ailələrini, qaziləri, eləcə də, imkansız veteran ailələrini daima diqqətdə saxlayıb, onlara ərzaq və digər yardımlar etmək adı çəkilən qurumların və adlarının çəkilməsini istəməyən şəxslərin mənəvi borcuna çevrilib.
Hər bayramda olduğu kimi Şəhid və qazi ailələrini unutmayan, yardımlar edən bu insanlar bu Novruz bayramı ərəfəsində də onları bayram sovqatları ilə ziyarət ediblər. Bir neçə gün davam edən aksiyada Göygöl filialına, Şəhid və qazi ailələrinə hər zaman dəstək olan xeyriyyəçilər fəallıq göstəriblər. Araz müəllim onların dəstəyindən ağızdolusu danışsa da, əksəriyyəti adlarının qeyd olunmasını istəmədilər. Buna baxmayaraq biz onlardan bir neçəsini sizlərə tanıtmaq istəyirik.
Xeyriyyəçilər Verdiyev Polad, Kərimov Mahir, Səlimov Pərviz, Quliyev Cavid və başqaları daima cəmiyyətə dəstək olur, Şəhid və qazi ailələrinə ərzaq və digər yardımlar edirlər. Onların bu saleh əməllərini həyata keçirilməsində təşkilatçılıq edən, düzgün istiqamətləndirən Göygöl filialının sədri Araz müəllim və köməkçiləri gələcəkdə də bu aksiyaları davam etməyi planlaşdırırlar.
Göygöl rayon filialının aktiv fəaliyyəti, xeyriyyə aksiyalarının və s. tədbirlərin təşkili Respublika Qarabağ Əlillərinə Qayğı İB-nin rəhbərliyi tərəfindən yüksək qiymətləndirilib, Araz müəllim başda olmaqla fəal üzvlər və bir neçə xeyriyyəçi cəmiyyətin “Fəxri diplom” və “Fəxri fərman”ları ilə təltif edilmişlər.
Bu xeyirhax missiyada əməyi keçən hər bir kəs gözəl sözlərə. tərifə layiqdir. Ən layiqlisini isə Allah verəcək. QƏQİB-in Göygöl rayon filialına, eləcə də adları çəkilən və çəkilməyən bütün yardımsevər insanlara bu savab işlərində uğurlar diləyirik, bu xeyirxah missiyanın davamlı olmasını arzu edirik. Allah sizdən razı olsun!
XURAMAN ETİBARLI
Comments